Mani Jayasi
ḳhair se ziist ka ai kaash ho anjam abhi
vaqt achchha hai zaban par hai tira naam abhi
haan labalab to hai labrez nahin jaam abhi
zabt men hai asar-e-gardish-e-ayyam abhi
vo nahin hain to nigahon men hai duniya andher
kaise raushan the munavvar the dar-o-bam abhi
yahi samjhenge mohabbat ko hayat-e-javed
jo samajhte hain use maut ka paigham abhi
be-niyazi-e-tamanna ki hai ik jannat-e-ishq
dil ne paaya nahin fitrat se ye in.aam abhi
ta-ba-me.araj-e-yaqin dekhiye kab tak pahunchun
dil ki gahra.iyon men hain bahut auham abhi
azim-e-bargah-e-dost tha ‘mani’ lekin
kya pahunchta ki hai sar bar-dar-e-asnam abhi
Leave a Reply