kabhi makan men kabhi rahguzar men rahte the
ye roz-o-shab to hamesha nazar men rahte the
hava ki raah men uḌti thi zindagi apni
misal-e-mauj kabhi ham bhanvar men rahte the
mohabbaton men bahut dil dhaḌakta rahta tha
ajiib log dil-e-mo’tabar men rahte the
hamen bhi shauq tha kuchh titliyan pakaḌne ka
tamam rang magar chashm-e-tar men rahte the
ḳhizan se pahle yahan ka ajiib mausam tha
samar ki tarah parinde shajar men rahte the
gurez-pa.i ka shikva karen to kis se karen
safar men rah ke bhi ham log ghar men rahte the
hava ke saath zamana badal gaya hai ‘razi’
hamin the vo jo kabhi is nazar men rahte the
Leave a Reply