Akhtar Ansari Akbarabadi
nazar se safha-e-alam pe ḳhunin dastan likhiye
qalam se kya hikayat-e-zamin-o-asman likhiye
miTa de jo faza ki tirgi mahaul ki pasti
koi aisa bhi sher ai shairan-e-ḳhush-bayan likhiye
bapa hain har jihat men atish-o-ahan ke hangame
kahan is daur men jaur-o-jafa-e-mahvashan likhiye
ḳhatar-ha-e-rah-e-majnun ka qissa kyuun bayan kijiye
nazar ko naqa-e-laila ḳhirad ko sarban likhiye
yahi hain yadgar-e-ghuncha-o-gul is zamane men
inhin sukhe hue kanTon se zikr-e-gulsitan likhiye
bayan karne ko hai tarz-e-tapak-e-dostan kaafi
ab is duniya men kya rang-e-ghurur-e-dushmanan likhiye
rivayat-e-kuhan men dilkashi baaqi nahin ‘aḳhtar’
nae andaz se tariḳh-e-shahr-e-gul-ruḳhan likhiye
Leave a Reply