ab bhi ik umr pe jiine ka na andaz aaya
zindagi chhod de pichha mira main baaz aaya
muzhda ai ruuh tujhe ishq sa dam-saz aaya
nakbat-e-faqr gai shah-e-sar-afraz aaya
paas apne jo naya koi fusun-saz aaya
ho rahe us ke hamen yaad tira naaz aaya
piite piite tiri ik umr kati us par bhi
piine vaale tujhe piine ka na andaz aaya
dil ho ya ruuh o jigar kaan khade sab ke hue
ishq aaya ki koi mufsida-pardaz aaya
le raha hai dar-e-mai-khana pe sun-gun vaaiz
rindo hushyar ki ik mufsida-pardaz aaya
dil-e-majbur pe is tarah se pahunchi vo nigah
jaise usfur pe par tol ke shahbaz aaya
kyuun hai khamosh dila kis se ye sargoshi hai
maut aai ki tire vaste hamraz aaya
dekh lo ashk-e-tavatur ko na puchho mira haal
chup raho chup raho is bazm men ghammaz aaya
is kharabe men to ham donon hain yaksan saaqi
ham ko piine tujhe dene ka na andaz aaya
naala aata nahin kan-ras hai faqat ai bulbul
mard-e-sayyah huun sun kar tiri avaz aaya
dil jo ghabrae qafas men to zara par kholun
zor itna bhi na ai hasrat-e-parvaz aaya
dekhiye nala-e-dil ja ke lagae kis se
jis ka khatka tha vahi mufsida-pardaz aaya
muddai basta-zaban kyuun na ho sun kar mire sher
kya chale sehr ki jab sahib-e-ejaz aaya
rind phailae hain chullu ko takalluf kaisa
saqiya Dhaal bhi de jaam khuda-saz aaya
na gaya par na gaya shama ka rona kisi haal
go ki parvana-e-marhum sa dam-saz aaya
ek chupki men gulu tum ne nikale sab kaam
ghamza aaya na karishma na tumhen naaz aaya
dhyan rah rah ke udhar ka mujhe dilvata hai
dam na aaya mire tan men koi dam-saz aaya
kis tarah maut ko samjhun na hayat-e-abadi
aap aae ki koi sahib-e-ejaz aaya
be-‘anis’ ab chaman-e-nazm hai viran ai ‘shad’
haae aisa na koi zamzama-pardaz aaya