khel donon ka chale tiin ka daana na paḌe
siḌhiyan aati rahen saanp ka ḳhana na paḌe
dekh me.amar parinde bhi rahen ghar bhi bane
naqsha aisa ho koi peḌ girana na paḌe
mere honTon pe kisi lams ki ḳhvahish hai shadid
aisa kuchh kar mujhe cigarette ko jalana na paḌe
is ta.alluq se nikalne ka koi rasta de
is pahaḌi pe bhi barud lagana na paḌe
nam ki tarsil se ankhon ki hararat kam ho
sard-ḳhanon men koi ḳhvab purana na paḌe
rabt ki ḳhair hai bas teri ana bach jaa.e
is tarah ja ki tujhe lauT ke aana na paḌe
hijr aisa ho ki chehre pe nazar aa jaa.e
zaḳhm aisa ho ki dikh jaa.e dikhana na paḌe
Leave a Reply