Poet
badan ko phunkti hain naghma-ḳhvaniyan pyare
surud-e-ishq na chheḌen javaniyan pyare
ye barg-e-zard ki bikhre paḌe hain rahon men
yahi hain mausam-e-gul ki nishaniyan pyare
qadam qadam gham-e-hijran ki be-panahi men
suna rahi hai mohabbat kahaniyan pyare
koi umiid na hoti to ji bahal jaata
rula rahi hain tiri mehrbaniyan pyare
charagh-e-hijr jalati rahi hain saari raat
sharik-e-hal miri ḳhun-fishaniyan pyare
khila rahi hain gul-e-zaḳhm dida-o-dil men
karishma-saz tiri dilsitaniyan pyare
har ik taraf se lapakta hai dil pe kaunda sa
ki tere husn ki hain qahar-maniyan pyare
dikha rahi hain tujhe be-shumar a.ine
miri nigah ki ye bad-gumaniyan pyare
tujhe kuchh aur bhi afsurda dekhte hain ‘nadim’
tujhe to raas nahin shadmaniyan pyare
Leave a Reply