Badan Ko Phunkti Hain Naghma-KHwaniyan Pyare

badan ko phūñktī haiñ naġhma-ḳhvāniyāñ pyāre

surūd-e-ishq na chheḌeñ javāniyāñ pyāre

ye barg-e-zard ki bikhre paḌe haiñ rāhoñ meñ

yahī haiñ mausam-e-gul kī nishāniyāñ pyāre

qadam qadam ġham-e-hijrāñ kī be-panāhī meñ

sunā rahī hai mohabbat kahāniyāñ pyāre

koī umiid na hotī to jī bahal jaatā

rulā rahī haiñ tirī mehrbāniyāñ pyāre

charāġh-e-hijr jalātī rahī haiñ saarī raat

sharīk-e-hāl mirī ḳhūñ-fishāniyāñ pyāre

khilā rahī haiñ gul-e-zaḳhm dīda-o-dil meñ

karishma-sāz tirī dilsitāniyāñ pyāre

har ik taraf se lapaktā hai dil pe kauñdā sā

ki tere husn kī haiñ qahar-māniyāñ pyāre

dikhā rahī haiñ tujhe be-shumār ā.īne

mirī nigāh kī ye bad-gumāniyāñ pyāre

tujhe kuchh aur bhī afsurda dekhte haiñ ‘nadīm’

tujhe to raas nahīñ shādmāniyāñ pyāre

Leave a Comment