qahqahe ki maut hai ya maut ki avaz hai
siskiyan leta hua ab zindagi ka saaz hai
ek saaya laḌkhaḌata aa raha hai is taraf
dekhiye to ik haqiqat sochiye tu raaz hai
ret men munh Daal kar sanson ka us ka rokna
chand sikkon ke liye bachcha baḌa janbaz hai
soch ki manzil kahin hai aur ankhen hain kahin
janta huun kis men kitni quvvat-e-parvaz hai
de raha vo dilase kyuun jafa karne ke ba.ad
chahta hai mujh se kya kaisa mira hamraz hai
kis tarah hoga bayan hal-e-dil-e-bimar ab
asman barham hai aur ḳhamosh charasaz hai
daur aaya hai ajab ‘anjum’ yahan hoshyar-bash
zaagh hai maḳhdum aur ḳhadim yahan shahbaz hai
Leave a Reply