makan se la-makan tak aa ga.e hain
kahan se ham kahan tak aa ga.e hain
jahan jalte hain par hosh-o-ḳhirad ke
junun men ham vahan tak aa ga.e hain
bhaḌak uTThi hai kaisi atish-e-gul
sharare ashiyan tak aa ga.e hain
ḳhulus-e-dosti par marne vaale
hayat-e-javidan tak aa ga.e hain
hamari gum-rahi manzil nishan hai
tajassus men kahan tak aa ga.e hain
vahan dil men mohabbat ki kami hai
jahan shikve zaban tak aa ga.e hain
tamasha-e-bahar-e-gul ki shaida
bahar-e-gul-ruḳhan tak aa ga.e hain
maqam apna nahin ma.alum lekin
jahan tum ho vahan tak aa ga.e hain
kisi ke jalva-ha-e-hairat-angez
nazar ke imtihan tak aa ga.e hain
na pahunche ḳhana-e-dil ke makin tak
zamin se asman tak aa ga.e hain
guzar kar ham ḳhudi vahm-o-guman se
ḳhuda jaane kahan tak aa ga.e hain
‘rishi’ manzil nahin ab duur ham se
ghubar-e-karvan tak aa ga.e hain
Leave a Reply