Aziz Hamid Madni
narmi hava ki mauj-e-tarab-ḳhez abhi se hai
ai ham-safir atish-e-gul tez abhi se hai
ik taza-tar savad-e-mohabbat men le chali
vo bu-e-pairahan ki junun-ḳhez abhi se hai
ik ḳhvab-e-ta.iran-e-baharan hai us ki aankh
ta.abir-e-abr-o-bad se labrez abhi se hai
shab-tab abhi se us ki qabaon ke rang hain
ik dastan jabin-e-guhar-rez abhi se hai
guzri hai ek rau mizha-e-ḳhvab-nak ki
dil men lahu ka rang bahut tez abhi se hai
a.ina le ke kho ga.i umr-e-nava-ḳhiram
taza-e-ruḳhi ka moḌ bala-ḳhez abhi se hai
mub.ham se ek ḳhvab ki ta.abir ka hai shauq
nindon men badalon ka safar tez abhi se hai
ik taaza mohr-e-lab se junun mangta hai naqsh
jumbish labon ki silsila-amez abhi se hai
shayad ki mahramana bhi uTThe tiri nigah
vaise tiri nigah dil-avez abhi se hai
Leave a Reply