abdul-ahad-saaz

Kharab-e-Dard Hue Gham-Parastiyon Mein Rahe

kharab-e-dard hue gham-parastiyon men rahe

khushi ki khoj bahana thi mastiyon men rahe

hua husul-e-zar-e-fan badi kashakash se

ham ek umr ajab tang-dastiyon men rahe

har ik se jhuk ke mile yuun ki sarfaraz hue

chatan jaise khamida si pastiyon men rahe

chubhan ki naav men pur ki khalij rishton ki

ajab mazaq se ham ghar girhastiy.on men rahe

kitaben chehre manazir tamam bada-kade

bataen kya ki badi mai-parastiyon men rahe

masafaten thiin shab-e-fikr kin zamanon ki

kahan kahan gae ham kaisi hastiyon men rahe

khulus-e-fikr ki galiyon men ghumte tanha

ham apne sher ki abad bastiyon men rahe

More Poems

Leave a Comment