aap jab bhi kabhi muskurane lage
dard jitne the mere suhane lage
raat puuri khaḌi hai abhi sahn men
taare mujh ko abhi se jagane lage
ḳhvab jalte hue rakh diye raah par
be-sahara the vo sab Thikane lage
is qadar jaan ko ho raha tha malal
aap ruThe nahin ham manane lage
ab ke shayad vo aa.ega is shahr men
baam par ham diye to jalane lage
bah gaya aankh se mera kajal to phir
ranj-o-gham dil ke sab hi chhupane lage
is qadar mehrban vo kahan mujh pe the
jis qadar vo mujhe ab jatane lage
Leave a Reply