Taklif-E-Iltifat-E-Gurezan Kabhi Kabhi

Urooj Zaidi Badayuni

taklif-e-iltifat-e-gurezan kabhi kabhi

yuun bhi hui hai pursish-e-pinhan kabhi kabhi

meraj-e-did jalva-e-janan kabhi kabhi

ham bhi rahe hain nazish-e-dauran kabhi kabhi

ye aur baat rabt-e-musalsal na kah saken

chuma hai ham ne daman-e-janan kabhi kabhi

naqsh-e-ḳhayal aap ki tasvir ban gaya

ye mo.ajiza hua hai numayan kabhi kabhi

bandi-navazi-e-karam-e-gah gaah se

ham bhi the ka.inat-badaman kabhi kabhi

laghzish ki baat virsa-e-adam ki baat hai

khata hai Thokaren dil-e-insan kabhi kabhi

karvaT badal ga.i hai tiri vaza-e-iltifat

dekha hai ye bhi ḳhvab-e-pareshan kabhi kabhi

ye sar-kashi ke naam se mansub hi sahi

hota hai dil bhi sar-ba-gareban kabhi kabhi

aksar nashat-e-sair-e-gulistan-e-be-ḳhizan

andaza-e-fareb-e-baharan kabhi kabhi

mere labon pe mauj-e-tabassum ke bavajud

gham ho gaya hai ruḳh se numayan kabhi kabhi

kahna paḌa hai jalva-e-sad-rang rokiye

nazren hui hain itni pareshan kabhi kabhi

ḳhud apne as-pas andheron ko dekh kar

ghabra uThi hai sub.h-e-baharan kabhi kabhi

daman bacha ke ham to guzar jaa.en ai ‘uruj’

ḳhud chheḌti hai gardish-e-dauran kabhi kabhi