Arsh Malsiyani
ḳhana-e-dil men daagh jal na saka
is men koi charagh jal na saka
na hue vo sharik-e-soz-e-nihan
dil se dil ka charagh jal na saka
soz-e-ulfat se aql hai mahfuz
jal gaya dil dimagh jal na saka
barq tha iztirab-e-dil lekin
arzuon ka baagh jal na saka
dil-e-mayus men umiid kahan
bujh ke phir ye charagh jal na saka
raushni-e-shu.ur bhi aa.i
phir bhi dil ka charagh jal na saka
‘arsh’ kya tujh se faiz mahfil ko
tu misal-e-charagh jal na saka
Leave a Reply