saari tartib-e-zamani miri dekhi hui hai
is ki tashkil purani miri dekhi hui hai
zarre zarre ko batata phirun kya bahr tha main
reg-e-sahra ne ravani miri dekhi hui hai
ye jo hasti hai kabhi ḳhvab hua karti thi
ḳhvab ki naql-e-makani miri dekhi hui hai
yunhi to kunj-e-qana.at men nahin aaya huun
khusravi shah-jahani miri dekhi hui hai
dil ke bazar men kya suud o ziyan hota tha
us ki arzani girani miri dekhi hui hai
ik zamane men to main lafz hua karta tha
tangi-e-ju-e-ma.ani miri dekhi hui hai
tum jo sunte ho charaghon ki zabani to suno
shab ki har ek kahani miri dekhi hui hai
main tire vasl ke gardab men aane ka nahin
is ki har mauj purani miri dekhi hui hai
Leave a Reply