Marghoob Asar Fatmi
darmiyan aa rahi hai nafrat kyuun
jab gale mil ga.e shikayat kyuun
aadmi tum bhi aadmi ham bhi
phir hui ḳhatm adamiyat kyuun
ho gaya ishq aap ko shayad
umr is men na.i musibat kyuun
kaun rakh paaya mal-o-daulat ko
jaane vaale se ye mohabbat kyuun
thak gaya hai mira sitamgar kya
saans le lene ki ijazat kyuun
sab ki maa.en bhi beTiyan hi thiin
aaj beTi bani musibat kyuun
aap ka sher bolta hai ‘asar’
ḳhud-sata.i ki phir zarurat kyuun
Leave a Reply