Saleem Siddiqui
ik dariche ki tamanna mujhe dubhar hui hai
vo ghuTan hi miri sanson pe muqarrar hui hai
aaj rakkhe hain qadam us ne miri chaukhaT par
aaj dahliz miri chhat ke barabar hui hai
niind ne niind se chaunka ke uThaya mujh ko
ḳhvab men ḳhvab ki ta.abir ujagar hui hai
us ne raton ke taqaddus ko kiya hai majruh
ek muTThi bhi jise dhuup mayassar hui hai
jab se sikha hai hunar shishagari ka main ne
bas usi din se ye duniya hai ki patthar hui hai
ab zaminon ko bichha.e ki falak ko oḌhe
muflisi to bhari barsat men be-ghar hui hai
ek muddat se jo sahra-e-masarrat thi ‘salim’
gham ke chhute hi vahi chashm samundar hui hai
Leave a Reply