Yahi Nahin Ki Faqat Baam-O-Dar Se Bach Ke Chalun

Poet

yahi nahin ki faqat bam-o-dar se bach ke chalun

talash-e-yar men shams-o-qamar se bach ke chalun

ye rang-o-nur hain daman-kash-e-hayat magar

hai maslahat ka taqaza udhar se bach ke chalun

ye pech-o-ḳham ye nasheb-o-faraz-e-rah-e-hayat

kahan se ho ke chalun aur kidhar se bach ke chalun

jo saath de na sake ta-harim-e-jalva-e-naz

main chahta huun har us rahguzar se bach ke chalun

jahan jabin ko na hasil ho rif.at-e-aflak

us astane se us sang-e-dar se bach ke chalun

main mutma.in nahin raftar-e-karvan se hanuz

ḳhata muaaf agar rahbar se bach ke chalun

main rang-e-gardish-e-dauran ko dekh kar ‘at.har’

ye sochta huun ki sham-o-sahar se bach ke chalun