Anwar Masood
kaisi kaisi ayaten mastur hain nuqte ke biich
kya ghane jangal chhupe baiThe hain ik daane ke biich
rafta rafta raḳhna raḳhna ho ga.i miTTi ki gend
ab ḳhalijon ke siva kya rah gaya naqshe ke biich
main to bahar ke manazir se abhi farigh nahin
kya ḳhabar hai kaun se asrar hain parde ke biich
ai dil-e-nadan kisi ka ruThna mat yaad kar
aan Tapkega koi aansu bhi is jhagḌe ke biich
saare aḳhbaron men dekhun haal apne burj ka
ab mulaqat us se hogi kaun se hafte ke biich
main ne ‘anvar’ is liye bandhi kala.i par ghaḌi
vaqt puchhenge ka.i mazdur bhi raste ke biich
Leave a Reply