vasl hi vasl rahe hijr ka imkan na ho
ai mire dost ye rishta kabhi be-jan na ho
ek qaidi ki tamanna hai naya shahr mile
shahr aisa ki jahan par koi zindan na ho
dil ko raas aa.i hain ye mushkilen mushkil se bahut
ab main ye chahta huun zindagi asan na ho
baat tujh se tire andaz men hi kar raha ho
mere lahje ki akaḌ sun ke tu hairan na ho
is qadar tang hain mayus nigahen us ki
maut bhi samne aa.e to pareshan na ho
kis ke aage ye mala.ek ki jabinen ḳham hain
jis ko sajda ye hua hai kahin insan na ho
Leave a Reply