kaT ga.e ham to habibon se ijazat le kar
ham se milta hai raqibon se ijazat le kar
nahin chara to hai tahzib isi men ai jaan
aaj mar jaa.en tabibon se ijazat le kar
ham to marte rahe shamshad qadon par aksar
kya ji.en aaj salibon se ijazat le kar
tum ne puchha to inayat hai tumhari varna
kaun jaata hai gharibon se ijazat le kar
zindagi kyuun hai tu ab mil ke pasheman ham se
tum ko aana tha nasibon se ijazat le kar
Leave a Reply