dashna-e-dard har ik saans men Thahra hoga
dil samundar hai to phir ghaav bhi gahra hoga
teri qurbat men miri saans ghuTi jaati hai
main ne socha tha tira jism bhi sahra hoga
mauj-e-ḳhun sar se guzar ja.egi jis raat mire
rang-e-pairahan-e-shab aur bhi gahra hoga
chal paḌe hain abhi jis par ye safiran-e-bahar
kisi bajti hui zanjir ka lahra hoga
ḳhushk patton pe chale jaise koi sham-e-ḳhizan
ab tiri yaad ka yuun jism pe pahra hoga
kya ḳhabar thi ye giran-goshi ka baa.is hogi
shahr ka shahr sada par miri bahra hoga
hijr ki aag men baḌhti hai ‘musavvir’ tab-o-tab
zahr-e-tanha.i se rang aur sunahra hoga
Leave a Reply