ham ne khud apni rahnumai ki
aur shohrat hui khudai ki
main ne duniya se mujh se duniya ne
saikdon baar bevafai ki
khule rahte hain saare darvaze
koi surat nahin rihai ki
tuut kar ham mile hain pahli baar
ye shuruat hai judai ki
soe rahte hain odh kar khud ko
ab zarurat nahin razai ki
manzilen chumti hain mere qadam
daad diije shikasta-pai ki
zindagi jaise-taise katni hai
kya bhalai ki kya burai ki
ishq ke karobar men ham ne
jaan de kar badi kamai ki
ab kisi ki zaban nahin khulti
rasm jaari hai munh-bharai ki
Leave a Reply