Sultan Akhtar
tilism-ḳhana-e-dil men hai char-su raushan
miri nigah ke zulmat-kade men tu raushan
bahut dinon pe hui hai rag-e-gulu raushan
sinan ki nok pe ho jaa.e phir lahu raushan
tamam raat main zulmat-e-intizar men tha
tamam raat tha mahtab-e-arzu raushan
main apne aap se hi jang karta rahta huun
ki mujh pe hota nahin ab mira udu raushan
ajiib shor munavvar dil o dimagh men hai
mire lahu men hai lekin sada-e-hu raushan
safar safar mire qadmon se jagmagaya hua
taraf taraf hai miri ḳhak-e-justuju raushan
bahar aa.i to ankhon men ḳhaak uḌne lagi
na koi phuul khila aur na rang o bu raushan
main tirgi ke samundar men Duub jaata huun
vo jab bhi hota hai ab mere ru-ba-ru raushan
ye aur baat ki ‘aḳhtar’ haveliyan na rahin
khanDar men kam to nahin apni aabru raushan
Leave a Reply