azmaish men kati kuchh imtihanon men rahi
zindagi kin raston men kin thikanon men rahi
vo to ik halki si dastak de ke rukhsat ho gaya
ik sada ras gholti din-rat kanon men rahi
likh gai apne gharon men ek karb-e-na-tamam
zindagi goya hamare mehrbanon men rahi
mit gaiin angan men saari khelti parchhaiyan
ek be-kaifi musalsal ashiyanon men rahi
vo zamin ki sarhadon men hi raha ‘anjum’ muqim
kyuun talash insan ko phir asmanon men rahi
Leave a Reply