Ai Duniya Tere Raste Se haT Jaenge

ai duniyā tere raste se haT jā.eñge

āḳhir ham bhī apne sāmne DaT jā.eñge

ham ḳhud ko ābād kareñge apne dil meñ

tere āñkh-jazīre se ab kaT jā.eñge

dhund se paar bhī kaam kareñgī apnī nazreñ

aañkh ke sāmne se ye bādal chhaT jā.eñge

āḳhir Dhal jā.egā ”jīvan-rog” kā sūraj

ham bhī ”okhe-din” haiñ lekin kaT jā.eñge

log hameñ mahsūs kareñge phuul aur taare

aur ham sochtī ”dil-āñkhoñ” meñ baT jā.eñge

dekhnā aisī raat bhī aa.egī jab ‘aḳhtar’

dhīre dhīre ham tāroñ se aT jā.eñge

Leave a Comment