Gurezan Tha Magar Aisa Nahin Tha

Abrar Ahmad

gurezan tha magar aisa nahin tha

ye mera ham-safar aisa nahin tha

yahan mehman bhi aate the hava bhi

bahut pahle ye ghar aisa nahin tha

yahan kuchh log the un ki mahak thi

kabhi ye rahguzar aisa nahin tha

raha karta tha jab vo is makan men

to rang-e-bam-o-dar aisa nahin tha

bas ik dhun thi nibha jaane ki us ko

ganvane men zarar aisa nahin tha

mujhe to khvab hi lagta hai ab tak

vo kya tha vo agar aisa nahin tha

padegi dekhni divar bhi ab

ki ye sauda-e-sar aisa nahin tha

khabar luun ja ke us isa-nafs ki

vo mujh se be-khabar aisa nahin tha

na jaane kya hua hai kuchh dinon se

ki main ai chashm-e-tar aisa nahin tha

yuun hi nimta diya hai jis ko tu ne

vo qissa mukhtasar aisa nahin tha