ab dil hai un ke halqa-e-dam-e-jamal men
dekha na tha jinhen kabhi khvab-o-khayal men
ai talkhi-e-firaq ba-juz nala-e-alam
paaya na kuchh bhi main ne umid-e-visal men
fitrat ne de ke ishq ko ehsas-e-zabt-e-shauq
uljha diya hai kashmakash-e-la-zaval men
bar-e-gham-e-jahan bhi hai tera khayal bhi
hain kitni vusaten dil-e-ashufta-hal men
avaz di hai tujh ko tasavvur ne barha
rah-e-surur men kabhi dasht-e-malal men
apne hi dil pe kuchh nahin mauquf ai ‘nasim’
har dil asiir hai gham-e-hasti ke jaal men
Leave a Reply