Baqi Siddiqui
dil jins-e-mohabbat ka ḳharidar nahin hai
pahli si vo ab surat-bazar nahin hai
har baar vahi soch vahi zahr ka saghar
is par ye sitam-e-jur.at-e-inkar nahin hai
kuchh uTh ke bagulon ki tarah ho ga.e raqsan
kuchh kahte rahe rasta hamvar nahin hai
dil Duub gaya lazzat-e-aghosh-e-sahar men
bedar hai is tarah ki bedar nahin hai
ham is se mata-e-dil-o-jan maang rahe hain
jo ek tabassum ka ravadar nahin hai
ye sar se nikalti hui logon ki fasilen
dil se magar unchi koi divar nahin hai
dam saadh ke baiTha huun agarche mire sar par
ik shaḳh-e-samar-dar hai talvar nahin hai
dam lo na kahin dhuup men chalte raho ‘baqi’
apne liye ye saya-e-ashjar nahin hai
Leave a Reply