jab koi phuul musaḳhḳhar na ho asani se
kaam leta huun vahan naqd-e-sana-ḳhvani se
raushni dene lage the miri ankhon ke charagh
raat takta tha samundar mujhe hairani se
kar ke dekhunga kisi tarah lahu ki barish
atish-e-hijr bujhegi na agar paani se
un ko paane ki tamanna nahin jaati dil se
kya munavvar hain sitare miri tabani se
koi masruf hai taz.in men qasr-e-dil ki
chob-kari se kahin a.ina-samani se
ḳhak-zadon se ta.alluq nahin rakhte kuchh log
mezbani se gharaz un ko na mehmani se
main isi ḳhaak pe baiTha huun baḌe shauq ke saath
koi nisbat nahin ab tak mujhe sultani se
band ho jaa.e agar rauzan-e-imkan-e-ḳhayal
ḳhvab khulte hain mire dil men faravani se
meri surat se jo bezar hain ab bhi ‘sajid’
kab vo ḳhush honge mire tarz-e-musalmani se
Leave a Reply