junun-e-shauq-e-mohabbat ki agahi dena
ḳhudi bhi jis pe ho qurban vo be-ḳhudi dena
na shor chahiye dariya ki tund maujon ka
mire lahu ko samundar ki ḳhamushi dena
tu de na de mire lab ko shaguftagi gul ki
jo de sake to shagufe ki bekali dena
shanaḳht jis se zamane men aadmi ki hai
ye iltija hai ki tu mujh ko vo ḳhudi dena
jhuka sake na mira sar koi bhi qadmon par
jo ho sake to mujhe tu vo sar-kashi dena
naqab ulaT de jo baḌh kar ruḳh-e-tamanna se
ye aarzu hai ki mujh ko vo tishnagi dena
na.i jihat se fan ko jo ashna kar de
mire qalam ko ḳhudaya vo kaj-ravi dena
Leave a Reply