vaan tabiat dam-e-taqrir bigad jaati hai
baat ki baat men tauqir bigad jaati hai
chaunk padta huun khushi se jo vo aa jaate hain
khvab men khvab ki taabir bigad jaati hai
kuchh vo padhne men ulajhte hain mira nama-e-shauq
kuchh ibarat dam-e-tahrir bigad jaati hai
chara-gar kya miri vahshat se junun bhi hai ba-tang
roz mujh se miri zanjir bigad jaati hai
dagh-e-ulfat vo buri shai hai ki kahne se ‘zahir’
mahr-o-mahtab ki tanvir bigad jaati hai