abul-hasanat-haqqi

Zamin Ne Kar Diya Is Tarah Raegan Mujhko

zamin ne kar diya is tarah raegan mujh ko

nazar na aaya kabhi dard aur dhuan mujh ko

talash karta hai ik dusra jahan mujh ko

adhura lagta hai ye jaan ka ziyan mujh ko

bichhe hue hain tasalsul se jalte bujhte charagh

hujum-e-lala-o-gul le gaya kahan mujh ko

bhatak rahe hain nazar men nuqush-e-gard-o-bad

jaga ke chhod gae pa-e-raftagan mujh ko

khud apni lauh-e-tamanna pe khil ke dekhunga

kisi ke jabr ne likkha tha raegan mujh ko

ye kis ke izn-o-raza se bahak rahe hain badan

fareb-rang na de paaya ye jahan mujh ko

siva-e-huzn-o-hazimat jagah nahin dil men

agar vo pher bhi de lashkar-o-nishan mujh ko

kisi ke bas men nahin hai kushad-e-qalb-o-nigah

mila tha apni hi qismat ka saeban mujh ko

hate ye ghaza-e-shab-rang to use dekhun

pasand hi nahin aina darmiyan mujh ko

tamam bar-e-alam dafatan gira sar se

ye raste men mila kaun na-gahan mujh ko

More Poems

Leave a Comment