mariz-e-ishq ko hai dard-e-dil dava ke liye
rahi ghiza so hai ḳhun-e-jigar ghiza ke liye
vo kargar ho dua kya bhala shifa ke liye
na jab dua men ho DhunDe asar dava ke liye
hain ab ke tez jo sahra men is qadar sar-e-ḳhar
ḳhuda hi jaane ki hain kis barahna-pa ke liye
na kyunki jaan de dil sadma-e-jigar sun kar
hamesha dete hain jaan yaari ashna ke liye
ham asiyon ka bhi allah hai gar ai vaa.iz
tu mo’taqid hai ki jannat hai parsa ke liye
jafa-e-charḳh-o-sitam-ha-e-ghair-o-hasrat-o-gham
ye jhagḌe jaan ko mol un se dil laga ke liye
vo qatil aa.e to yaan ham bhi sar hatheli par
liye phire hain usi ḳhanjar-azma ke liye
tum apna dil liye phirte ho us ne lakhon dil
isi tarah se hain baten bana bana ke liye
hua hai rang-e-hina ‘aish’ zeb-e-pa us ke
ye ja-e-rashk hai rutba ho ye hina ke liye
Leave a Reply