Mohabbat Sulh Bhi Paikar Bhi Hai

mohabbat sulh bhi paikar bhi hai

ye shakh-e-gul bhi hai talvar bhi hai

tabiat is taraf khuddar bhi hai

udhar nazuk mizaj-e-yar bhi hai

ada-e-ishq ada-e-yar bhi hai

bahut saada bahut purkar bhi hai

ye fitne jin se ik duniya hai nalan

inhin se garmi-e-bazar bhi hai

junun ke dam se hai nazm-e-do-alam

junun barham-zan-e-afkar bhi hai

nafas par hai madar-e-zindagani

nafas chalti hui talvar bhi hai

isi insan men sab kuchh hai pinhan

magar ye maarifat dushvar bhi hai

vo bu-e-gul ki hai jan-e-chaman bhi

qayamat hai chaman-be-zar bhi hai

yahi duniya hai nisbat ansuon ki

yahi duniya tabassum-zar bhi hai

jahan vo hain vahin mera tasavvur

jahan main huun khayal-e-yar bhi hai

khabar-dar ai subuk-saran-e-sahil

ye sahil hi kabhi manjdhar bhi hai

ghanimat hai ki is daur-e-havas men

tira milna bahut dushvar bhi hai

jo koi sun sake to nikhat-e-gul

shikast-e-rang ki jhankar bhi hai

un ankhon ki zahe mojaz-bayani

baham inkar bhi iqrar bhi hai

Leave a Comment