maryam-naz

Tabinda Bahaaron Ke Nazare Nahin Dekhe

tabinda baharon ke nazare nahin dekhe

tu ne vo chamakte hue taare nahin dekhe

kuchh is liye bhi niind hamen aati hai jaldi

ankhon ne abhi khvab tumhare nahin dekhe

khud haath milaya hai samundar men bhanvar se

kashti ne talatum men sahare nahin dekhe

mumkin hai kisi taur koi chara bhi hota

tu ne hi kabhi zakhm hamare nahin dekhe

kya kya na sitam mujh pe kiya raat ne aa kar

din kaise miri jaan guzare nahin dekhe

kya dekh rahe ho ye mohabbat ke karam hain

tum ne kabhi taqdir ke maare nahin dekhe

More Poems

Leave a Comment