Had Ho Chakki Hai Sharm-E-Shakebai Khatm Ho

had ho chakki hai sharm-e-shakebai khatm ho

behtar hai ab dua ki pazirai khatm ho

lenge hisab mujh se abhi lafz lafz ka

yaani zara ye anjuman-arai khatm ho

dekha hai is navah men vo kuchh ki ai khuda

ab to yahi dikha ki ye binai khatm ho

mumkin hai muntazir ho koi khak-e-khush-khisal

shayad kahin ye sahil-e-rusvai khatm ho

hai duud khak-dar bahut paak ho hava

paani hai zer-e-bar bahut kaai khatm ho

khush-rang men ghula hua bad-rang ho juda

aur shor men chhupi hui tanhai khatm ho

apne muqabil aap hi aa ja.unga kabhi

tang aa chuka huun ab miri yaktai khatm ho

aakar vo meri baat sune aur javab de

gar yuun nahin to phir ye shanasai khatm ho

bazar-e-bosa tez se hai tez-tar ‘zafar’

ummid to nahin ki ye mahngai khatm ho

Leave a Comment