mere ahval ka afsana banaya hota
har pari-zad ko divana banaya hota
tu jo raushan mira kashana banaya hota
munh har ik sham.a se parvana banaya hota
haar to us ke gale ke na bane ashk mire
dil ko baale hi ka durdana banaya hota
dekhi masjid ki bana main ne ye dil main socha
kaash is ja koi mai-ḳhana banaya hota
dekhte shauq se chhati ko laga bhi lete
dil ko jo a.ina-ḳhana na banaya hota
hasrat-e-bosa-e-lab kis liye janan rahti
ḳhaak se mere jo paimana banaya hota
sar ko baazu pe mire aap jo rakh kar sote
zulf ka palkon hi se shana banaya hota
chaman-e-kucha-e-janan men jo hota main ‘nasim’
ghair ko sabza-e-begana banaya hota
Leave a Reply