barish hui to phulon ke tan chaak ho gae
mausam ke haath bhiig ke saffak ho gae
badal ko kya khabar hai ki barish ki chaah men
kaise buland-o-bala shajar khaak ho gae
jugnu ko din ke vaqt parakhne ki zid karen
bachche hamare ahd ke chalak ho gae
lahra rahi hai barf ki chadar hata ke ghaas
suraj ki shah pe tinke bhi bebak ho gae
basti men jitne ab-gazida the sab ke sab
dariya ke rukh badalte hi tairak ho gae
suraj-dimagh log bhi ablagh-e-fikr men
zulf-e-shab-e-firaq ke pechak ho gae
jab bhi gharib-e-shahr se kuchh guftugu hui
lahje hava-e-sham ke namnak ho gae