rafta rafta ḳhatm qissa ho gaya hona hi tha
vo bhi aḳhir mere jaisa ho gaya hona hi tha
dasht-e-imkan men ye mera mashghala bhi ḳhuub hai
rauzan-e-divar chehra ho gaya hona hi tha
Dubta suraj tumhari yaad vapas kar gaya
shaam aa.i zaḳhm taaza ho gaya hona hi tha
ahd-e-zabt-e-gham pe qaa.im tha dam-e-ruḳhsat magar
vo sukut-e-jan bhi dariya ho gaya hona hi tha
ab tu hi ye fasla tai kar sake to kar bhi le
main to ḳhud apna hi ziina ho gaya hona hi tha
main ne bhi parchha.iyon ke shahr ki phir raah li
aur vo bhi apne ghar ka ho gaya hona hi tha
Leave a Reply