ye mo.ajiza bhi dikhati hai sabz aag mujhe
paron baghair uḌati hai sabz aag mujhe
main ayaton ki tilavat men mahv rahta huun
har ik bala se bachati hai sabz aag mujhe
har ek shaḳh pe rakhti hai zard qindilen
phir us ke ba.ad jalati hai sabz aag mujhe
men ab-e-surḳh men jab ḳhvab tak pahunchta huun
to mere samne laati hai sabz aag mujhe
hina.i paanv ragaḌte hue na ghaas pe chal
tujhe ḳhabar hai ki bhati hai sabz aag mujhe
main jab bhi jalte hue ko.elon pe sota huun
to asman se bulati hai sabz aag mujhe
zamin pe naag hain aur un ke munh men ḳhvab ki lau
kahaniyon se Darati hai sabz aag mujhe
Leave a Reply