khul ke sachcha.i ka iz.har nahin kar sakte
ham jo karte hain vo aḳhbar nahin kar sakte
zindagi tera taqaza hai ki sarpaT dauḌen
ham vo lachar ki inkar nahin kar sakte
un ko haq hai ki vo inkar bhi kar sakte hain
ham pe qadghan hai ki israr nahin kar sakte
sab ke sab mil ke mire samne saf-ara hain
kaam aisa hai ki do-char nahin kar sakte
tujh se ik kaam hai aur kaam bhi aisa hai ki jo
chashm-o-abru lab-o-ruḳhsar nahin kar sakte
ham ne ik umr kya un pe bharosa ‘maz.har’
ham vahi kaam lagatar nahin kar sakte
Leave a Reply