Zanjir Se uThti Hai Sada Sahmi Hui Si

zanjir se uThti hai sada sahmi hui si

jaari hai abhi gardish-e-pa sahmi hui si

dil TuuT to jaata hai pe girya nahin karta

kya Dar hai ki rahti hai vafa sahmi hui si

uTh jaa.e nazar bhuul ke gar janib-e-aflak

honTon se nikalti hai dua sahmi hui si

haan hans lo rafiqo kabhi dekhi nahin tum ne

namnak nigahon men haya sahmi hui si

taqsir koi ho to saza umr ka rona

miT jaa.en vafa men to jaza sahmi hui si

haan ham ne bhi paaya hai sila apne hunar ka

lafzon ke lifafon men baqa sahmi hui si

har luqme pe khaTka hai kahin ye bhi na chhin jaa.e

mede men utarti hai ghiza sahmi hui si

uThti to hai sau baar pe mujh tak nahin aati

is shahr men chalti hai hava sahmi hui si

hai ‘arsh’ vahan aaj muhit ek ḳhamoshi

jis raah se guzri thi qaza sahmi hui si