Fasih Akmal
us ki divar pe manqush hai vo harf-e-vafa
jis ki ta.abir ko ḳhvabon ka sahara na mila
meri tanha.i se ukta ke tira naam bhi kal
apne mustaqbil-e-taban ki taraf lauT gaya
jab ḳhayalat mira saath nahin dete hain
dil men dar aati hai chupke se vo manus sada
aise ḳhush-rang sarabon ka sahara kab tak
muskurata huun to deti hai tamanna ye sada
main ne chaha tha na.i sub.h ka suraj ban ja.un
duur tak daman-e-shab aur bhi kuchh phail gaya
phir ḳhuda.i men hai kyuun ghor andheron ko sabat
ham chalo maan ga.e ek tajalli hai ḳhuda
sher kahta huun to ‘akmal’ mira dil kahta hai
fikr-e-avara pe alfaz ki chadar na chaḌha
Leave a Reply