poet

Ho Chuka Waz Ka Asar Waiz

ho chuka vaaz ka asar vaaiz

ab to rindon se dar-guzar vaaiz

subh-dam ham se tu na kar takrar

hai hamen pahle dard-e-sar vaaiz

bazm-e-rindan men ho agar shamil

phir tujhe kuchh nahin khatar vaaiz

vaaz apna ye bhuul jaae tu

aave gar yar-e-sim-bar vaaiz

hai ye murgh-e-sahar se bhi faaiq

subh uthta hai peshtar vaaiz

masjid-o-kaaba men tu phirta hai

ku-e-janan se be-khabar vaaiz

shor-o-ghul band to nahin karta

hai tu insan ki koi khar vaaiz

zahiri vaaz se hai kya hasil

apne batin ko saaf kar vaaiz

banda-e-ku-e-yar hai ‘bahram’

teri masjid se kya khabar vaaiz

More Poems

Leave a Comment