Jis Mein Ek Sahra Tha Ek Diwana Tha

jis meñ ik sahrā thā ik dīvāna thā

soch rahā huuñ vo kis kā afsāna thā

ḳhvāb to mujh ko mele tak le aa.e the

niiñd ke bāhar to vo hī vīrāna thā

chādar ke bāhar bedārī baiThī thī

aise meñ kyā paañv mujhe phailānā thā

ek akelī nazm thī puure safhe par

nazm thā baaqī par jo vo vīrāna thā

raat banā detī thī ik pal yādoñ kā

maazī tak yuuñ merā aanā jaanā thā

‘ātish’ tujh ko naaz bahut thā sūraj par

shaam ke Dhalte hī jis ko bujh jaanā thā

Leave a Comment