jab sambhal kar qadam uThata huun
koi Thokar zarur khata huun
aap se jab nazar milata huun
kaun huun kya huun bhuul jaata huun
mujh pe ai rang Dalne vaalo
main to rangon ka janmdata huun
vaqt hai mubtala-e-ḳhvab-e-adam
Thokaren maar kar jagata huun
zehn aisa hai kuchh paraganda
yaad karta huun bhuul jaata huun
DhunDhte phir rahe hain donon jahan
dekhiye kis ke haath aata huun
ab nahin hai karahne ki sakat
choT khata huun muskurata huun
Leave a Reply