Poet
mast nazron ka iltifat na puchh
jhuum uThi dil ki ka.enat na puchh
apni nazron ki kaifiyat na puchh
muskura di miri hayat na puchh
ishq men har qadam hai ik manzil
rah-e-ulfat ki mushkilat na puchh
main huun aur aap ka tasavvur hai
ab miri raunaq-e-hayat na puchh
jaise har lahza dekhte ho mujhe
miri mashq-e-tasavvurat na puchh
harf-e-matlab zaban pe la na saka
dil men ab tak hai dil ki baat na puchh
hijr ka haal kya bata.en ‘vaqar’
kaise din guzra kaise raat na puchh
Leave a Reply