gul yaad na amvaj-e-nasim-e-sahari yaad
kuchh bhi nahin juz alam-e-be-bal-o-pari yaad
ḳhurshid-e-sahar ariz-e-mahtab ka aalam
nazron ko abhi tak hai tiri jalvagari yaad
su-e-haram-o-dair kabhi ruḳh na karenge
jin ko mire saaqi ki hai rangin-nazari yaad
jalvon ka taqaza nahin karti nazar un ki
rahti hai jinhen husn ki divana-gari yaad
ye vaqt ba-har-hal guzar ja.ega lekin
rah ja.egi aahon ki hamen be-asari yaad
main vo huun ki parde men tujhe dekh chuka huun
shayad ho tujhe meri vasi.a-un-nazari yaad
mai-ḳhana tha aur shaghl-e-mai-nab tha ‘sha.ir’
ab tak hai mujhe daman-e-zahid ki tari yaad
Leave a Reply