Ijtiba Rizvi
ghup andhera hai kya qayamat hai
ik tabassum ki phir zarurat hai
sar ko siine pe rakh ke sun liije
aap se dil ko kuchh shikayat hai
nasehon se hai mai-kashi ka farogh
shauq parvarda-e-malamat hai
dil ki dhaḌkan jo hai madar-e-hayat
ik zara tez ho to aafat hai
aag paani se bhaap uThti rahi
ham samajhte rahe mohabbat hai
dahr men ham kamal-e-san.at hain
aur baaqi fareb-e-san.at hai
zulf bikhra do donon aalam par
ki andhere ki phir zarurat hai
abhi jiine ka hukm hai ‘rizvi’
aur kya jaane kya musibat hai
Leave a Reply