asrarul-haq-majaz

Shauq Ke Hathon Ai Dil-E-Muztar Kya Hona Hai Kya Hoga

shauq ke hathon ai dil-e-muztar kya hona hai kya hoga

ishq to rusva ho hi chuka hai husn bhi kya rusva hoga

husn ki bazm-e-khas men ja kar is se ziyada kya hoga

koi naya paiman bandhenge koi naya vaada hoga

charagari sar ankhon par is charagari se kya hoga

dard ki apni aap dava hai tum se kya achchha hoga

vaiz-e-sada-lauh se kah do chhode uqba ki baten

is duniya men kya rakkha hai is duniya men kya hoga

tum bhi ‘majaz’ insan ho akhir laakh chhupao ishq apna

ye bhed magar khul jaega ye raaz magar ifsha hoga

More Poems

Leave a Comment